திராவிடர்’ என்னும் சொல் தேர்வு ஏன்? - ப.திருமாவேலன்

 

கட்டுரை : ‘திராவிடர்’ என்னும் சொல் தேர்வு ஏன்?

செப்டம்பர் 16-30,2021

  September 17, 2021உண்மை

ப.திருமாவேலன்

மீண்டும் மீண்டும் ‘திராவிடர்’ என்னும் சொல்லுக்கு விளக்கம் அளித்து விரல் தேய்ந்து விட்டது. ‘திராவிடம்’ என்பதற்கு வாய்க்கு வந்தபடி பொருள் சொல்லிக் கொண்டு இருக்கிறார்கள் திராவிட எதிரிகள்!

‘திராவிடம்’ என்றால் ஆரியம்!

‘திராவிடம்’ என்றால் பார்ப்பனர்கள்! _ என்று தமிழ்த்தேசியம் என்ற பெயரால் அலையும் சிலர் சொல்லித் திரிகிறார்கள். ‘திராவிடர்கள்’ என்று யாரும் கிடையாது என்றும் இவர்கள் சொல்கிறார்கள். இதையே, ‘ஆரியர்களும் இல்லை, அதனால் திராவிடர்களுக்கும் இல்லை’ _ என்று ஆரியச் சக்திகளே சொல்கிறது!

ஆரிய சக்திகளும் _ தமிழ்த்தேசியம் என்று சொல்லிக் கொள்பவர்களும் சொல்வது ஒன்றுதான். ஆரிய சக்திகளுக்காவது 100 சதவிகித நேர்மை உண்டு. அவர்கள் தங்கள் இனத்துக்கு உண்மையாக இருக்கிறார்கள். ஆனால், தமிழ்த்தேசியம் என்கிற பெயரால் பேசுபவர்கள் தமிழினத்தின் துரோகிகள். அந்தத் துரோகத்தை மறைப்பதற்காக, ‘திராவிடம்’ என்னும் சொல்லுக்கு எதிராக யுத்தம் செய்கிறார்கள்.

‘திராவிடம்’ என்னும் சொல் ஒரு காலத்தில் இடப்பெயராக _ அதன் பிறகு மொழிப் பெயராக _ சில காலத்தில் இனப்பெயராக இருந்தது என்பதை திராவிட மொழியியல் ஞாயிறு தேவநேயப்பாவாணர் அவர்கள் தனது நூல்களில் பல இடங்களில் எழுதி இருக்கிறார். ‘திராவிடம்’ என்பது இன்று ஒரு தத்துவத்தின் சொல்லாக இருக்கிறது. அந்தத் தத்துவத்தை அயோத்திதாசர், இரட்டமலை சீனிவாசன், எம்.சி.ராஜா ஆகியோர் முன்மொழிந்து அரசியல் களத்தில் போராடினார்கள். இன்னொரு பக்கத்தில் தந்தை பெரியார் பயன்படுத்திப் போராடினார். ‘திராவிடத்தை’  பேசிய பெரியாரை, தெலுங்கர் என்று சொல்பவர்கள், அயோத்திதாசரை, இரட்டமலையாரை, எம்.சி.ராஜாவை நோக்கி உள்நோக்கம் கற்பிக்க முடியாமல் போனது ஏன்? திராவிடம் பேசுபவர்கள் அனைவரும் தெலுங்கர்கள் என்றால் இவர்கள் யார்?

பெரியார் கேட்டுவந்த ‘திராவிட நாடு’ என்பது அன்றைய சென்னை மாகாணம். இதில் தமிழர்களோடு தெலுங்கர், மலையாளிகள், கன்னடர் வாழ்ந்து வந்தார்கள். இதில் முதன்முதலாக தெலுங்கர்கள் தனி மாகாணம் கேட்டார்கள். இது பெரியாருக்கு சிக்கலை உணர்த்தியது. நாம் ஒன்றாக இருக்கலாம் என்று முதலில் சொன்னார். தான் கேட்டு வந்த திராவிடநாட்டுக்கு மொழிவாரி மாகாணப் பிரிவினை என்பது தடை போடும் தந்திரமாக அரசியல் ரீதியாகவும் பார்த்தார். ஆனால், தெலுங்கர்கள் சென்னை மாகாணத்தையும் தங்களுக்குக் கேட்க ஆரம்பித்தும் தான் பெரியாருக்குள் இருந்த ‘தமிழன்’ விழித்தான். ‘தெலுங்கர் பேராசை’ என்ற தலையங்கம் தீட்டினார். நான்கு மொழிக்காரர்களையும் திராவிடர்கள் என்று அழைத்து வந்தவர்களை, தமிழர்களைப் பிரித்து ‘தமிழ்த்திராவிடர்கள்’ என்று சொல்ல ஆரம்பித்தார். சென்னை நகர், தமிழ்த் திராவிடனிடமிருந்து பறித்துக் கொள்ளப்படுவதை எந்த ஒரு திராவிடனும் ஒப்புக்கொள்ளவே முடியாது’’ என்று எழுதினார். (‘குடிஅரசு’ 27.8.1949) இதிலிருந்தே தமிழர்களுக்கு மட்டுமான அரசியல் தொடங்கிவிட்டது.

ஆந்திரர்களின் தனி மாகாணமாகப் பிரிந்து செல்வதை ஆதரித்த பெரியார், அவர்கள் சென்னையைக் கேட்டதைக் கண்டித்தார். ஆந்திரர்களுக்குச் சென்னை கிடையாது _ கிடைக்காது என்று எழுதினார். ம.பொ.சி. சென்னை மாநகராட்சியில் கொண்டுவந்த தீர்மானத்தை முழுமையாக ஆதரித்தார். ஆந்திர ராஜ்யத்துக்கு சென்னை நகர் தற்காலிகத் தலைநகராகவும் இருக்கக் கூடாது என்பதை திராவிடர் கழக மத்திய நிருவாகக் குழு தீர்மானமாக நிறைவேற்றியது. (‘விடுதலை’ 11.1.1953)

சென்னையில் நடந்த கூட்டத்தில் பேசிய பெரியார், ‘தமிழ் பேசும் மக்கள் நாட்டில் தெலுங்கு பேசும் மக்கள் ஆட்சி இருப்பதா?’ என்று கேட்டார். மலையாளிகளுக்கு எதிராக தென் திருவிதாங்கூரில் நடக்கும் தமிழர் போராட்டத்தை பெரியார் ஆதரித்தார். வடக்கில் தெலுங்கர், தெற்கில் மலையாளிகள் தமிழர்களுக்கு எதிராக நடத்தும் அனைத்து ஆர்ப்பாட்டங்களையும் கண்டித்தார். தென்னிந்தியப் பகுதிகள் இணைந்த தட்சிணப் பிரதேசம் திட்டத்தை எதிர்த்தார். இதனை மலையாளிகளின் சூழ்ச்சி என்றார். (‘விடுதலை’ 11.10.1955) தமிழர் பேசும் பகுதிகளை மட்டும் கொண்ட தமிழ்ப்பகுதிகளை இணைத்து தமிழ்நாடு உருவாக்கச் சொன்னார்.

1956ஆம் ஆண்டு மொழிவாரியாக மாகாணங்கள் பிரிந்துவிட்டன. வடநாட்டான் சுரண்டலில் இருந்து முழுமையாக விடுதலையடைய முன்வராத ஆந்திரமும் கேரளாவும் கன்னடமும் பிரிந்து போய்விட்டதால் இனி தமிழ்நாடு முழு விடுதலையடைய போராட வேண்டியதுதான் என்றார். இன்றிருப்பது தனித் தமிழ்நாடுதான் என்றார். தமிழ்நாட்டில் எஞ்சியுள்ள தெலுங்கர், மலையாளிகள் அவரவர் மாநிலத்துக்கு போய்விட வேண்டியதுதான் என்றார். ஆந்திர, கேரள, கன்னட மொழிக்காரர்கள் தொல்லை நீங்கிவிட்டது என்றார்.

அப்படியானால் திராவிடர் என்பதற்குப் பதிலாக தமிழர் என்றே இனி கூறலாமே என்று தனக்குத்தானே கேட்டுக் கொண்ட பெரியார், “திராவிடர் என்றால் ஆரியருக்கு எதிரிகள் என்ற பொருளிருப்பதனால் ஆரியர்களை அறவே ஒதுக்க முடிகிறது’’ என்றார். (‘விடுதலை’ 8.11.1956) அதுவரை கேட்டு வந்த ‘திராவிடநாடு’ இனி ‘தமிழ்நாடு’ ஆகிறது.

24.8.1958 அன்று வேலூரில் நடந்த சுதந்திரத் தமிழ்நாடு மாநாட்டில் பேசும் போது, “’இன்று மற்றவர்கள் எல்லோரும் பிரிந்து தனித்-தனியே நாடுகளாகப் போய்விட்டார்கள். இன்று தமிழ்நாடு என்று தெளிவாகச் சொல்ல முடிகிறது’’ என்று பேசினார் பெரியார். (‘விடுதலை’ 30.8.1958) திடீரென்று குரல் மாற்றிப் பேச ஆரம்பித்துள்ளார் பெரியார் என்ற குற்றச்சாட்டு எழுந்தது. அப்போதுதான், ‘சூழ்நிலைக்கேற்ப நமது குரல் மாறலாம். கொள்கை அணுவளவும் மாறாது’ என்று சென்னையில் பேசினார். ‘இனம் நோக்கில் திராவிடமும் மொழி அடிப்படையில் தமிழ்நாடும் அடைவதே நமது இலட்சியம்’ என்றார். தமிழ்நாடு கேட்கிறாயே உன் திராவிட நாடு என்ன ஆயிற்று என்று கேட்பவர்களுக்கு பதில் அளிக்கும் வகையில் பேசினார்.

“திராவிட நாடு என்று சொன்னாலும் தமிழ்நாடு என்று சொன்னாலும் இரண்டும் ஒன்றுதான். அகராதியில் எடுத்துப்பார். இலக்கியத்தைப் படித்துப் பார். அதிலிருக்கிறது தமிழ்நாடு என்றால் திராவிடநாடு. திராவிடநாடு என்றாலும் தமிழ்நாடுதான். இரண்டுக்கும் பெயர்தான் வேறே தவிர மற்றபடி காரியங்கள் எல்லாம் ஒன்றுதான். … இனத்தால் நாம் திராவிடர்கள். மொழியால் நாம் தமிழர்கள்’’ என்று விளக்கம் அளித்தார். (‘விடுதலை’ 13.8.1958)

‘திராவிடன்’ என்று சொல்வது ஏன் என்ற  இந்த விவாதங்களுக்கு பதில் அளிக்கும் வகையில் “மர மண்டைகளுக்கு மீண்டும் கூறுகிறோம்’’ என்ற தலையங்கம் தீட்டப்பட்டது.

திராவிடன் என்னும் சொல்லை ஏன் பயன்படுத்துகிறோம் என்பதற்கான விளக்கம் சொல்லப்பட்டது.

“திராவிடம் என்ற சொல்லை விடக்கூடாது என்று சொல்லி வருகிறோம். திராவிடன் என்ற சொல்லுக்கு அஞ்சுவது போல் தமிழன் என்ற சொல்லுக்கு அக்கிரகாரத்தான் அஞ்சுவதில்லை. தமிழன் என்றால், ஆமாம் சார் நாமெல்லாம் தமிழன்னோ என்று உடனே உறவு கொண்டாடுகிறான். இதைக் கேட்கும் தமிழன் (‘திராவிடன்’) பல்லை இளிக்கிறான். ‘அல்ல சார் அல்ல! நீர் ஆரியர்! நான் தமிழர்’ என்று கூறக்கூடியவன் கருஞ்சட்டைக்காரன் ஒருவன் தானே? தேவநேயப்பாவாணர், சுப்புரெத்தினம், வை.பொன்னம்பலனார் போன்ற அரை டஜன் புலவர்கள் தானே? மற்ற எல்லாத் தமிழ்ப் புலவர்களும் எல்லா அரசியல் கட்சிக்காரர்களும் எல்லாத் தலைவர்களும் ஆரியனையும் தமிழன் என்றுதானே கூறுகிறார்கள்? தென் ஆர்க்காடு கிராமவாசியான ஒரு தற்குறித் தமிழனுக்கு இருக்கிற அறிவுகூட இவர்களுக்கெல்லாம் இல்லையே? கிராமவாசித் தமிழன் படிப்பு எழுத்து வாசனை இல்லாதிருந்தாலும் ‘அதோ போகிறவன் பார்ப்பான், இதோ வருகிறான் தமிழன்’ என்று பிரித்துக் கூறத் தெரிகின்ற அடிப்படை இன உணர்ச்சி அறிவாவது இருக்கிறதே!

அந்த அறிவு எல்லாத் தமிழர்களுக்கும் வருகின்ற வரையிலும் தமிழர் என்ற சொல்லுக்குப் பதிலாக திராவிடர் என்ற சொல்லைப் பயன்படுத்த வேண்டியிருப்பது இன்றியமையாததாகிறது’’ (‘விடுதலை’ 22.11.1958) என்று எழுதினார்.

திராவிடநாடு முழக்கத்தை சுதந்திரத் தமிழ்நாடு முழக்கமாக பெரியார் மாற்றினார். திராவிடநாடு என்று சொல்லக் கூடாது என்று கூறினார். திராவிட நாடு என்பதை எதிர்க்கும் திராவிடர் கழகத்தவர் ‘தமிழர் கழகம்’ என்று பெயர் வைத்துக் கொள்ள வேண்டியது தானே என்ற குற்றச்சாட்டு எழுந்தது. ‘இது திராவிடர் கழகம், ஆரியர்கள் சேர முடியாத கழகம்’ என்று விளக்கம் அளித்தது ‘விடுதலை’. பார்ப்பனர் ஆதிக்கத்தை எதிர்ப்பதற்காக உருவாக்கப்பட்ட கழகம், எந்தப் பிரச்னையையும் ஆரியர் _ திராவிடர் என்ற பூதக்கண்ணாடி போட்டு சோதிக்கிறது இக்கழகம் என்றது அத்தலையங்கம். (‘விடுதலை’ 22.6.1961)

1955ஆம் ஆண்டு பிறந்து அப்போதே கொல்லப்பட்ட தட்சிணப்பிரதேசம் உருவாக்கம் மீண்டும் 1963ஆம் ஆண்டு வேறொரு வடிவத்தில் வந்தது. தமிழகத்தையும் கேரளாவையும் இணைக்க வேண்டும் என்று அப்போது சொல்லப்பட்டது. ‘முளையிலேயே இதனைக் கிள்ளி எறியவேண்டும்’ (‘விடுதலை’ 9.2.1963) என்று எழுதினார். சுரண்டல் கொடுமை, மலையாளிகள் தொல்லை என்று கண்டித்தார். மலையாளிகளை பசுத்தோல் போர்த்திய புலிகள் என்று கண்டித்து தலையங்கம். (‘விடுதலை’ 10.1.1964)

இப்படி 1956 முதல் ‘திராவிடநாடு’ என்பதைக் கைவிட்டு, ‘தமிழ்நாடு’ என்பதை உச்சரித்தார் பெரியார்! இந்த நிலைப்பாட்டை முழுமையாக விளக்கி ஆசிரியர் கி.வீரமணி அவர்களால் ‘தமிழ்நாடா? திராவிட நாடா?’ என்னும் குறுநூல் எழுதி 4.8.1961 அன்று வெளியிடப்பட்டது. அதில் பெரியாரின் அறிக்கை ஒன்றை ஆசிரியர் அவர்கள் மேற்கோள் காட்டுகிறார். அதில் ‘திராவிடம்’ என்னும் சொல்லை தான் எதற்காகப் பயன்படுத்த வேண்டி உள்ளது என்பதை பெரியார் சொல்கிறார்.

“நம் நாட்டுக்கு சமுதாயத்திற்கு இனத்திற்கு திராவிடம் என்று இருந்த பெயர், அது தமிழல்ல என்பதானாலும் நமக்கு அது ஒரு பொதுக்குறிப்புச் சொல்லும் ஆரிய எதிர்ப்பு உணர்ச்சிச் சொல்லுமானதாக இருக்கிறதே என்று வலியுறுத்தி வந்தேன்’’ என்கிறார் பெரியார். (தமிழ்நாடா? திராவிடநாடா? பக்கம் 13) திராவிடன் என்ற சொல்லை விட்டு விட்டு தமிழன் என்று சொன்னால் பார்ப்பான் (ஆரியன்) நானும் தமிழன் தான் என்று உள்ளே புகுந்து விடுகிறான்’’ என்கிறார் பெரியார்.

திராவிடன் என்னும் சொல் தேர்வின் காரணம், ஆரியம் என்பதன் எதிர்ப்-புணர்ச்சிக்காகவே!

தமிழன் என்னும் சொல்லைப் பயன்-படுத்தாமல் இருந்ததற்குக் காரணம், ஆரியப் பார்ப்பனரும் தாங்களும் தமிழர்கள் என்று உள்ளே நுழைந்து விடுவார்கள் என்பதற்-காகத்தான். அதனால்தான் தமிழன் என்று அவர் பேசுவதை விடவில்லை. ‘தமிழா எழுச்சி கொள்’ என்றே சொன்னார்.

திராவிடர் கழகம் என்று பெயர் வைக்காமல் போயிருந்தால், சூத்திரர் கழகம் என்பதே தான் வைக்கப் பொருத்தமான பெயர் என்று சொன்னதன் காரணம், பார்ப்பனரல்லாதார் _ சூத்திரர் _ திராவிடர் என்ற சொல்லுக்குள் பார்ப்பனர் நுழைய முடியாது என்பதால் தான்.

மற்றபடி அதற்கு வடுகர், பார்ப்பனர் என்று தமிழ்த்தேசியர்கள் சொல்வது அவர்களது அறிவுப் பலவீனத்தின் கனமான கற்பனையே தவிர வேறல்ல.

திராவிடர் கழகத்தின் கொள்கையை எதிர்க்க முடியாமல் திராவிட முன்னேற்றக் கழகத்தின் ஆட்சியில் குறை கண்டுபிடிக்க முடியாத நிலையில் தனது கையறு நிலையில் கனைத்துக் கொண்டு இருக்கிறார்கள். இதைப் பற்றிக் கவலை இல்லை. இவை காலம் காலமாகப் பார்த்த கனைப்புகள்தாம்!ஸீ

சிந்து சமவெளி திராவிட நாகரிகமே! சமஸ்கிருதத்திற்குரிய பங்கு ஏதுமில்லை

   September 22, 2022 • Viduthalai

வரலாற்று ஆய்வாளர் பாலகிருஷ்ணன் கருத்து

சென்னை,செப்.22- இங்கி லாந்தைச் சேர்ந்த தொல்லியல் ஆய்வாளர் சர் ஜான் ஹூபர்ட் மார்ஷல், ஹரப்பா, மொகஞ்சதாரோ பகுதிகளில் மேற் கொண்ட அகழாய்வுகளின்படி, சிந்து சமவெளி நாகரிகத்தை முதன்முதலில் கண்டறிந்தார்.

அதற்கான அதிகாரப்பூர்வ அறிவிப்பு 1924 செப்டம்பர் 20ஆம் தேதி வெளியிடப் பட்டது. அந்த நிகழ்வின் 98-ஆவது ஆண்டை நினைவூட்டும் வகையிலான சிறப்புக் கருத் தரங்கம் சென்னை தரமணியில் உள்ள ரோஜா முத்தையா ஆராய்ச்சி நூலகத்தில்  நடை பெற்றது.

இதில் ‘தெற்காசியாவின் தாய்நிலம்’ என்ற தலைப்பில் ஒய்வுபெற்ற அய்ஏஎஸ் அதி காரியும், வரலாற்று ஆய்வாள ருமான ஆர்.பாலகிருஷ்ணன் பேசியதாவது

இந்தியாவில் பேசப்படும் அனைத்து மொழிகளும் சமஸ் கிருதத்தில் இருந்து பிரிய வில்லை என்பதை அறிய 1924ஆம் ஆண்டு வரை இந்த உலகம் காத்திருக்க வேண்டியிருந்தது. ஜான் மார்ஷல் சிந்துசமவெளி நாகரிகத்தை அறிவித்த பின்னர்தான் அனைத்து சூழல்களும் மாறின. ஆரியர்களுக்கு முன்பும் மிகச் சிறந்த நாகரிக வளர்ச்சியை சிந்து சமவெளி மக்கள் அடைந்திருந்தனர்.

அத்தகைய சிந்து சமவெளி நாகரிகத்துடன் நம்மை இணைக்கும் பாலமாக சங்க இலக்கியங்கள் திகழ்கின்றன. ஹரப்பா, மொகஞ்சதாரோ நாகரிகங்கள் இடையே உள்ள இடைவெளியை அறிய வழி செய்ததும் சங்க இலக்கி யங்கள்தான்.

தெற்காசியாவின் கடந்த காலத்தை மீண்டும் உருவாக்க சங்க இலக்கியத்தின் கூறுகள் அவசியம். அதில் பாலைவனம் உள்பட புவியியல் சார்ந்த அனைத்து அம்சங்களும் இடம் பெற்றுள்ளன.

சிந்து சமவெளி நாகரிகத்தில் வாழ்ந்த மக்கள் மொழிவாரியாக திராவிடர்களாகத்தான் இருப் பார்கள் என்பதை வரலாற்று ரீதியாக எடுத்துக்கூறி வருகி றோம்.

இந்த நிலத்தில், உறவுக்குள் திருமணம் செய்யும் முறை இருந்ததற்கான சாத்தியம் உள் ளது. தற்போது தமிழர்களுக்கும், திராவிடர்களுக்கும் இடை யேயான வேறுபாடு குறித்து தெளிவான புரிதல் இல்லாமல் பலர் பேசிவருகின்றனர். ஆனால், ஒருங்கிணைந்த தமிழி னத்தைப் பற்றி அறிந்து கொள் வதற்கு, திராவிடர் உள்ளிட்ட பிரிவுகள் அவசியமானவை.

சமஸ்கிருதத்தில் இருக்கும் அம்பா என்னும் சொல்கூட ஆரிய மொழி கிடையாது. அது திராவிட மொழிதான். கிழக்கு ஈரானிய மொழி, நேபாளி, அசாமி உள்பட 11 மொழிகளில் சிந்து சமவெளியில் பேசப்பட்ட ‘ஆய், இ’ எனும் வார்த்தைகள் இடம்பெற்றுள்ளன. அவற் றுக்கு அம்மா என்ற பொருளும் உணர்த்தப்பட்டுள்ளது.

இந்திய-அய்ரோப்பிய மொழிகளில் இருந்து ஸ்பா னிஷ், உக்ரேனியன், ஆங்கிலம் என பல்வேறு கிளை மொழிகள் உருவாகியுள்ளன. ஏனெனில், இங்குள்ள மா-டர் என்ற சொல் ஆங்கிலத்தில் மதர், சம்ஸ் கிருதத்தில் மாத்ரு என பொருள்படுகிறது. இதன்மூலம், சிந்துசமவெளி நாகரிகம் பரந்து காணப்பட்டதை நாம் அறிய முடிகிறது. இவ்வாறு அவர் பேசினார். பின்னர், பார்வை யாளர்களின் கேள்விகளுக்கு பாலகிருஷ்ணன் விளக்கம் அளித்தார்.

சிந்தனைக் களம் : சிந்து சமவெளி நாகரிகம் ஆரியர் நாகரிகமா?

ஜனவரி 16-31,2022, உண்மை இதழ்

Leave A CommentOn சிந்தனைக் களம் : சிந்து சமவெளி நாகரிகம் ஆரியர் நாகரிகமா?

 சிந்து சமவெளி நாகரிகம்  ஆரியர் நாகரிகமா?

கவிஞர் கலி.பூங்குன்றன்

 குடுமியை அவிழ்த்து விட்டுக் கூத்தாடும் காரக்பூர் அய்.அய்.டி

அய்.அய்.டி காரக்பூர் நாட்காட்டியில் ஆரியர்கள் வருகை தொடர்பான தவறான தகவல் இடம் பெற்றுள்ளது வரலாற்று ஆய்வாளர்களை வியப்பில் ஆழ்த்தியுள்ளது.

இந்தியாவில் முக்கிய தொழில் நுட்பக் கல்வி நிறுவனங்களில் ஒன்றாக காரக்பூர் அய்.அய்.டி தனது நாட்காட்டியில் பிப்ரவரி மாதப் பகுதியில் ஆரியர்கள் குறித்து சான்று-களே இல்லாத கற்பனைத் தகவல்களை வெளியிட்டுள்ளது. அதில் ‘சுவஸ்திக்’ என்ற சின்னம் வேதகாலத்தில் வாழ்ந்த முனிவர்-களால் உருவாக்கப்பட்டது என்றும், சிந்துவெளி நாகரிகத்தில் மிகவும் முக்கியமான முத்திரையாக இதை அங்கு வாழ்ந்த மக்கள் பயன்படுத்தினார்கள் என்றும் உண்மைக்குப் புறம்பாக கூறப்பட்டுள்ளது.

 இதுகுறித்து கேள்விப்பட்ட அறிவியல் ஆய்வாளர்கள் மற்றும் வரலாற்று ஆசிரியர்கள் தங்களின் கடுமையான எதிர்ப்பைத் தெரிவித்துள்ளனர்.

 ஆரியர்கள் மத்திய ஆசியாவின் ஸ்டெபி புல்வெளியிலிருந்து வந்தவர்கள் என்பது அறிவியல் சான்றுகளோடு உறுதி செய்யப்-பட்டுள்ளது. மேலும் சிந்துப் பகுதி மக்களுக்கும் ஆரியர்களின் எந்த ஒரு பழக்க வழக்கங்களுக்கும் எள்ளளவும் தொடர்பில்லை. சிந்துவெளி நாகரிகத்தின் போது ஆரியர்களின் வருகை இல்லை. சுமார் 200 ஆண்டுகளாக ஹரப்பா, மொகஞ்சதாரா (பாகிஸ்தான்), ராகிகாடி, தொலவீரா (இந்தியா) உள்ளிட்ட பல பகுதிகளில் நடந்த ஆய்வில் ஆரியர்-களுக்கும் சிந்துவெளி மக்களுக்கும் எந்த ஒரு தொடர்பும் இல்லை என்பது உறுதியானது.

 ஆனால், அறிவியல் பூர்வமாக செயல்பட வேண்டிய காரக்பூர் அய்.அய்.டி.யின்

 (அய்.அய்.டி. என்றால் அய்யர், அய்யங்கார் டெக்னாலஜிதானே!) காலண்டரில் “இழந்துபோன இந்திய அறிவுத் தளத்தை மீட்கும் தொழில் நுட்பம்’’ என்ற தலைப்பில் சிந்துவெளி நாகரிகத்தில் கிடைத்த பொருள்களை ஆரிய நாகரிகத்தோடு சேர்த்து “பெருவெளி மற்றும் காலம், அண்டத்தின் ஒளி மற்றும் யுகங்கள், பெருவெளியின் காலத்திற்-கான விதிகள்’’ என பல முட்டாள்தனமான தலைப்புகளில் சிந்துவெளி நாகரிகத்தில் கிடைத்த பொருள்களோடு ஒப்பிட்டு, தலைப்பிட்டு நாள்காட்டியில் எழுதியுள்ளனர்.

 மேலும் சிந்துவெளியில் வேதத்தின் 12 ரகசிய அடையாளம், சிந்து சமவெளி நாகரிகத்தின் சின்னங்களின் உண்மையான அடையாளம், ஆரியப் படையெடுப்பு என்பது கட்டுக்கதை, சிந்துவெளி மக்கள் ஆரியர்களே இந்த மண்ணின் மக்களே போன்ற தலைப்புகளில் நாட்காட்டி முழுவதும் கற்பனைக் கதைகளை கட்டவிழ்த்து விட்டுள்ளனர். மேலும் சில முத்திரைகளைக் காட்டி ஆரியர்கள் தான் இந்தியாவை அறிவின் ஆற்றல் தளமாக மாற்றிக் காண்பித்தனர் என்றும் கதைத்துள்ளனர்.

 தற்போது சமூகவலைதளங்களில் எழுதி-வரும் கற்பனைக் கதைகளை அப்படியே ஒரு பெரிய தொழில் நுட்ப நிறுவனம் நாட்காட்டியில் கொண்டுவந்து அனைவரையும் படிக்கவைப்பது குறித்து வரலாற்று ஆய்வாளர்கள் அதிர்ச்சி அடைந்துள்ளனர்.

 இது தொடர்பாக அய்.அய்.டி பேராசிரியர் ஜாய் சென் கூறும் போது, “நாம் மறைக்கப்பட்ட வரலாற்றை இதுவரை படித்து வந்தோம், தற்போது உண்மைகளை அறியும் நேரம் வந்துவிட்டது. இந்த நாட்காட்டி  உண்மை-களை வெளிப்படுத்திட ஓர் ஆரம்பப் புள்ளி என்று கூறினார். மேலும் ஆரியர்களின் வருகை என்பது கற்பனைக் கதை, ஆரியர்கள் இந்த மண்ணுக்கானவர்களே என்ற புரட்டுகளின் மீதான குறித்த நீண்ட ஆய்வை இந்த நாட்காட்டியின் மூலம் துவக்கி உள்ளோம்’’ என்று கூறினார்.

 இது தொடர்பாக மும்பை ஹோமிபாபா அறிவியல் வரலாற்று நிறுவனப் பேராசிரியர் சுலே கூறும் போது, “அய்.அய்.டி போன்ற கல்வி நிறுவனங்கள் இது போன்ற கற்பனைக் கதைகளை அறிவியல் வரலாறு என்ற பெயரில் வெளியிடும் போது அதன் தாக்கம் மக்களிடையே வெளிப்படும். உண்மைகளை என்றுமே மறைக்க முடியாது ஆனால் இவர்கள் உண்மைக்குப் புறம்பானவற்றை ஆவணப் படுத்தும் வேலையில் ஈடுபட்டு வருகின்றனர். இது கண்டிக்கத்தக்கது’’ என்று ஊடகம் ஒன்றில் காலண்டர் குறித்த கேள்விக்குப் பதிலளித்தார்.

வரலாற்றைத் திரிப்பது, உருட்டல், புரட்டல் செய்வது என்பது ஆரியர்களுக்கே உரித்தான ‘தனிக்கலை’. கீழடி ஆய்வைக்கூட நடத்த விடாமல் முட்டுக்கட்டை போட்டதற்-கெல்லாம் கூட உண்மை வெளிவந்தால், அது திராவிடர்களின் தமிழர்களின் தொன்மை வெளிச்சத்துக்கு வந்துவிடுமே என்ற அச்சம்தான். எடுத்துக்காட்டுக்காக சில இங்கே:

நாகசாமி என்ற முன்னாள் தொல்பொருள் துறை இயக்குநராக இருந்த பார்ப்பனர் எழுதுகிறார் _ திராவிட நாகரிகம் என்ற ஒன்றே கிடையாதாம் (துக்ளக் _ 27.11.2019)

“திராவிடக் கண்ணாடியும் கீழடி ஆய்வும்’’ என்ற தலைப்பில் துக்ளக்கில் ஒரு கட்டுரை இடம் பெற்றுள்ளது.(25.10.2017) திராவிடம் என்பது எல்லாம் திராவிடர் கட்சிகளின் கண்டுபிடிப்பாம். ஆனால், உண்மை வரலாறு என்ன? சிந்துச் சமவெளி குறித்த ஆய்வுகள் என்ன கூறுகின்றன? ஏராளமுண்டு என்றாலும், எடுத்துக்காட்டுக்கு சில இங்கே….

சிந்துவெளி – தமிழி (தென்பிராமி) எழுத்தாய்வுப் பயிலரங்கம் (Indus – Tamil (Brahmi) script study workshop)

பழங்காலத் தமிழ் எழுத்துகளின் தோற்றம் வளர்ச்சி குறித்த ஆய்வில் 2007 முதல் சிந்துவெளி எழுத்தாய்வு நடுவம் ஈடுபட்டுள்ளது. சிந்து வெளி எழுத்தாய்வு நடுவமும் சென்னைப் பல்கலைக் கழகத் தமிழ்மொழித் துறையும் இணைந்து 23.08.2014 முதல் 10 காரி (சனி)க்கிழமைகள் (முற்பகலில்) சிந்துவெளி – தமிழி (தென்பிராமி) எழுத்தாய்வுப் பயிலரங்கம் நடத்தியது.

இதற்கு முன் பத்து பயிலரங்குகள் நடத்தப்பட்டு 500 மாணவர்கள் பயிற்சி பெற்றுள்ளனர். பயிலரங்கின் நிறைவுவிழா நவம்பர் திங்களில் நடைபெற்றது.

தொன்முது நாகரிகங்களில் முன்முது நாகரிகமான சிந்துவெளி நாகரிகம் திராவிட நாகரிகம் எனப் பின்லாந்து அறிஞர் அசுகோ பர்பலோ, அறிஞர் அய்ராவதம் மகாதேவன் போன்றோர் உலக அரங்கில் நிலைநாட்டியுள்ளனர். மூன்று தமிழ்ச் சங்க வரலாற்றின்படி முதல் தமிழ்ச் சங்க காலத்தில் ஓவிய எழுத்தும் இரண்டாம் தமிழ்ச் சங்க காலத்தில் சிந்துவெளி எழுத்தும் மூன்றாம் தமிழ்ச் சங்க காலத்தில் தென்பிராமி எனப்படும் தமிழி எழுத்தும் அதிலிருந்து வட்டெழுத்தும் சோழர் காலத்தில் இன்றைய தமிழ் எழுத்துமாக வளர்ந்த தமிழ் எழுத்துகளின் வளர்ச்சி வரலாறு தமிழ் எழுத்துகளின் சங்கிலித் தொடர் போன்று தொடர்பு அறாத 5000 ஆண்டுக்காலத் தமிழ் எழுத்தின் தொன்மையைப் புலப்படுத்துகிறது.

 பயிரலங்கம் வாயிலாகப் புலப்பட்ட உண்மைகள்

 சிந்துவெளி எழுத்தும் தமிழி எழுத்தும் தமிழர்களால் தமிழுக்காகத் தமிழ்நாட்டில் கண்டுபிடிக்கப்பட்டவை.

தமிழர் நாகரிகம், சிந்துவெளி நாகரிகம் என்னும் பெயரில் தெற்கிலிருந்து வடக்கே பரவியது. மிகத் தொன்மையான சிந்துவெளி எழுத்து தமிழ்நாட்டில் தான் செம்பியன் கண்டியூர் கற்கோடரியில் (கோகாங்கன் என்னும் பெயர் சிந்துவெளி எழுத்தில்) கிடைத்துள்ளது.

சிந்துவெளி எழுத்தின் மிகமிகத் தொன்மையான எழுத்துச் சான்றுகளும், கீறல் எழுத்து எனப்படும் (Graffiti) சிந்துவெளி கையெழுத்து வரிவடிவ வேறுபாடுகளும், அதன் பின்னர்த் தோன்றிய தமிழி (பிராமி) எழுத்து படிப்படியாக வளர்ந்த வளர்ச்சியும், விடுபட்ட இணைப்புகளும் தமிழ்நாட்டு அகழாய்வில் கிடைத்துள்ளன. இந்தப் படிமுறை வளர்ச்சி சிந்துவெளியில் கிடைக்கவில்லை.

சிந்துவெளி எழுத்துக் குறியீடுகள் இன்றும் நாட்டுப்புற மட்பாண்டத் தொழிலாளர், சலவைத் தொழிலாளர் உள்ளிட்ட 18 வகை பல்வேறு தொழிற் பிரிவினரிடை வெறும் அடையாள எழுத்துகளாக வழங்கிவருகின்றன.

சிந்துவெளி எழுத்தும் தமிழி (தென்பிராமி) எழுத்தும் இந்தியாவின் (Pan Indian Script) ஒரே பொது எழுத்தாக நின்று நிலவின என்பது நன்கு உறுதிப்படுகிறது.

தமிழ் எழுத்து 5000 ஆண்டுத் தொன்மையுடையது. தமிழிலக்கியம் 2000 ஆண்டுத் தொன்மையுடையது.

Language is fossil history and fossil, poetry as well. (R.C.Trench)
All of Indian civilization is built on an underlying base of Dravidian language and culture. (S.A.Tyler -1973

மெய்யெழுத்து ஒலிக் குறியீட்டொடு உயிர் எழுத்து ஒலிக் குறியீடுகளை எந்த இடத்தில் எந்தத் திசையில் சேர்த்து எழுதுவது என்பது சிந்துவெளி எழுத்துகளின் காலத்திலிருந்து தமிழ் பிராமி எழுத்து வடிவங்களின் காலம் வரையிலும் தொடர்ந்து ஒரே முறையில் பெரும்பாலும் அமைக்கப்பட்டுள்ளது.

 «««

சிந்து சமவெளி திராவிடர் நாகரிகமே!

தமிழ்நாட்டில் புதிய கற்காலக் கோடரி – கண்டுபிடிப்பு

சிந்து சமவெளி நாகரிக எழுத்துகளுடன் புதிய கற்காலக் கோடரி தமிழ்நாட்டில் கண்டுபிடிக்கப்பட்டுள்ளது.

நம் நாட்டில் முதன்முதலாகக் கண்டு-பிடிக்கப்பட்ட கல்வெட்டு பொறிக்கப்பட்ட கல் ஆயுதம் இது என்பது குறிப்பிட்டத்தக்கது.

தமிழரின் எழுத்துத் தொன்மையை உறுதிப்படுத்தும் மிகச் சிறந்த சான்று இது என்று தொல்லியல் ஆய்வாளர்கள் கூறுகிறார்கள்.

நாகப்பட்டினம் மாவட்டம் மயிலாடுதுறை வட்டம் செம்பியன் கண்டியூரில் கடந்த பிப்ரவரியில் மேற்கொண்ட கல் ஆய்வில் இரண்டு புதிய கற்காலக் கைக்கோடரிகள் கண்டெடுக்கப்பட்டன.

அவற்றில் ஒன்றில் 3,500 ஆண்டுகளுக்கு முற்பட்ட (கி.மு.1500) மொஹஞ்சதாரோ – ஹரப்பா பண்பாட்டுக் கால எழுத்துகள் பொறிக்கப்பட்டுள்ளது தெரிய வந்துள்ளது என்று தமிழ்நாடு அரசு தொல்லியல் துறையின் சிறப்பு ஆணையர் ஸ்ரீதர் தெரிவித்தார். சென்னையில் அண்மையில் நடைபெற்ற சிறப்புச் சொற்பொழிவில் பேசிய அவர் இது குறித்துக் கூறியது. இதுவரை இதுபோன்ற குறியீடுகள் தமிழ்நாட்டுப் பாறை ஓவியங்களிலும் இரும்புக்கால ஈமச்சின்னங்களில் இருந்து கிடைத்த பானை ஓடுகளிலும் மட்டுமே கிடைத்துள்ளன.

தற்போது கற்கருவி கிடைத்த செம்பியன் கண்டியூரில் இரும்புக் காலத்தைச் சேர்ந்த தாழிகள், கருப்பு – சிவப்பு மட்கலன்கள், குறியீடு பொறிக்கப்பட்ட பானை ஓடுகள் மற்றும் எலும்புத் துண்டுகள், சாம்பல் நிற மட்கலன்கள் ஆகியவையும் கிடைத்துள்ளன.

கருவியில் நான்கு பொறிப்புகள் உள்ளன. முற்பொறிப்பு குத்திட்டு அமர்ந்த நிலையில் உள்ள மனித வடிவுடையதாகவும். அடுத்த பொறிப்பு கோப்பை வடிவிலும், மூன்றாவது பொறிப்பு ஏறத்தாழ முத்தலைச் சூலம் போன்ற அமைதியிலும், நான்காவது பொறிப்பு குத்திட்ட பிறை வடிவின் நடுவில் ஒரு வளையத்தை இணைத்தது போலவும் உள்ளன.

தொல்லியல் ஆய்வாளர் அய்ராவதம் மகா தேவன் ஆய்வின்படி, முதலிரு பொறிப்புகளுக்கும் முரு என்றும் அன் என்றும் பொருள் கொள்ளலாம்.

புதிய கற்காலக் கற்கருவியில் இவ்வெழுத்துப் பொறிப்புகள் கிடைத்ததன் மூலம். புதிய கற்காலத் தமிழ்நாட்டு மக்கள் ஹரப்பா பண்பாட்டு மற்றும் நாகரிகக் கூறுகளைத் தொடர்ந்து பின்பற்றியவர்கள் என்பது உறுதியாகிறது என்றார் ஸ்ரீதர்.

இக்கண்டுபிடிப்பின் மூலம் சிந்துவெளி நாகரிகமும், தொல் தமிழ் நாகரிகமும், திராவிட நாகரிகம் என உறுதி செய்யப்பட்டுள்ளது என்று ‘தினமணி’யின் முன்னாள் ஆசிரியரும், தொல்லியல் ஆய்வாளருமான அய்ராவதம் மகாதேவன் தெரிவித்தார்.

தமிழ்நாட்டில் சிந்துவெளி எழுத்துகள் பொறித்த ஒரு கற்காலக் கருவி என்பதுதான் இக்கண்டுபிடிப்பின் முக்கியத்துவமாகும். இப்புதிய கற்காலக் கருவி சுமார் கி.மு. 1500க்கு மேற்பட்ட காலத்தில் உருவாக்கப்பட்டிருக்க வேண்டும். கி.மு.1000த்துக்குப் பிறகு, இரும்பு வந்த பிறகு இக்கருவிகள் உருவாக்கப்படவில்லை, இதில் ஒரு பீடத்தில் உட்கார்ந்து இருக்கும் உருவத்தை அக்காலக் கடவுள் என்றும், அது முருகனைக் குறிக்கிறது என்றும் கூறுகிறார் அவர். இதே உருவங்கள் பொறித்த பெருங்கற்காலப் பானைகள் திண்டிவனம் _ சானூர், திருநெல்வேலி _ மாங்குடி கேரளத்தில் முசிறி ஆகிய இடங்களில் கிடைத்துள்ளன என்று அய்ராவதம் மகாதேவன் தெரிவித்தார். (‘தினமணி’ -_ 02.05.2006)

குறிப்பு : சிந்துசமவெளி நாகரிகம் ஆரிய நாகரிகமே என்று பொய்ப் பிரச்சாரம் செய்யும் பார்ப்பனர்களுக்கு இந்த ஆதாரம் மரண அடியாகும்.

 

– தமிழாலயம் – மார்ச் – ஏப்ரல் – 2010

 

«««

 

சிந்துச் சமவெளி நாகரிகம் திராவிடர் நாகரிகமே!

கல்வெட்டு ஆய்வாளர் அய்ராவதம் மகாதேவன் உறுதி

சிந்துச் சமவெளி நாகரிகம், திராவிடர்களின் நாகரிகம் என்பதை, ரிக் வேதத்தின் வழியாக, பிரபல கல்வெட்டு ஆய்வாளர் அய்ராவதம் மகாதேவன் விளக்கினார். சென்னை, தரமணி ரோஜா முத்தையா ஆராய்ச்சி மய்யத்தில், சிந்துச் சமவெளிக் குறியீடுகளை விளக்கும், ‘டிராவிடியன் ப்ரூஃப் ஆஃப் தி இண்டஸ் ஸ்க்ரிப்ட் வையா தி ரிக் வேதா’ என்ற புத்தகத்தின் வழியாக, அய்ராவதம் மகாதேவன் அளித்த விளக்கம்:

சிந்துச் சமவெளி முத்திரைகளைத் தொடர்ந்து ஆராய்ந்து, அவற்றை அடையாளம் கண்டால், ஒன்றுக்கொன்று தொடர்புடைய, திராவிட மொழியின் அர்த்தங்கள் கொண்டதாக உள்ளன என்பதை அறிய முடிகிறது. அவை, தொல் திராவிட வடிவங்களே என்பதும் உறுதியாகிறது.

சிந்துச் சமவெளி முத்திரைகளை வாசிப்பதன் மூலம், சிந்துச் சமவெளி மரபுகள், இரண்டு நீரோடைகளாகப் பிரிந்துள்ளதாக சான்றுகள் அறிவிக்கின்றன. அவை, முந்தைய திராவிட மரபின் வேர்கள், பண்டைய தமிழகத்திற்குள்ளும், சிந்துச் சமவெளியிலும் இருப்பதை, சிந்துவெளி முத்திரைகள் உறுதிப்படுத்துகின்றன.

பாண்டியர்களின் மூதாதையர்கள், சிந்துச் சமவெளியில் வணிகத்தில் ஈடுபட்டவர்களாக இருந்திருக்கலாம். அவர்கள், தெற்கு நோக்கி நகர்ந்து, திராவிட மொழி பேசியிருக்கலாம். குறிப்பாக, பண்டைத் தமிழ் பேசியவர்களாக இருந்திருக்கலாம். முந்தைய இந்திய _- ஆரியப் பண்பாட்டுக்குள் உள்ள (ரிக் வேதம்) வார்த்தைகள், சிந்துவெளியில் இருந்து, கடன் மொழியாக நுழைந்திருக்கின்றன. ரிக் வேதத்தில் வரும், ‘பூசன்’ என்ற கடவுளின் பெயர், சிந்துவெளி மக்களிடம் இருந்து எடுக்கப் பட்டதாக அறிய முடிகிறது. சிந்துச்சமவெளி நாகரிகம், முன் வேதப் பண்பாட்டை விட, காலத்தால் மிக முந்தையது என்பது, இதனால் விளங்குகிறது. சிந்துச்சமவெளி குறியீடுகளுக்கும், பண்டைத் தமிழ்ச் சொற்களுக்குமான தொடர்பு அதிகம் இருப்பதை, சங்க காலத் தமிழ்ச் சொற்கள் மூலமாக அறியலாம். சிந்துவெளிக் குறியீடுகளில், மாற்றுதல், பெறுதல், சாலைகள் சந்திக்கும் தெருக்கள், வணிகன் உள்ளிட்ட குறிகளுக்கு இணையான வார்த்தைகள், தொல்தமிழில் உள்ளன. எனவே, சிந்துச் சமவெளி நாகரிகம், திராவிடர்களின் நாகரிகம் என்பதை அறிய முடிகிறது. இவ்வாறு, அவர் விளக்கம் அளித்தார்.

(‘தினமணி’ – 29.01.2015)

 «««

கல்வெட்டு

மொகஞ்சதாரோ, அரப்பா, தொல்நகர்களில் வாழ்ந்தோர் திராவிடரே!

மொகஞ்சதாரோ, அரப்பா தொல் நகர்களில் காணப்படும் சித்திர எழுத்துகளை முன்னரே பலர் ஆராய்ந்து அங்கு வாழ்ந்தோர் திராவிடரே எனச் சொல்லியுள்ளனர். 1980ஆம் ஆண்டில் அவ்விரு எழுத்துகளைப் புதுமுறை எந்திரங்களின் துணை கொண்டு நன்காராய்ந்து அவை திராவிடர் புழங்கியதே என்ற உருசியப் பேரரறிஞர் குணோரோசோவ் உறுதிப்-படுத்தியுள்ளார். தற்போது வால்ட்டர் பேர்செர்விசு என்ற அமெரிக்க மாந்தவியலறிஞரும் அவை திராவிடர்களின் மொழியே என்ற மறுவுறுதிப்படுத்தியுள்ளார். அவர்தம் ஆய்வுக் கட்டுரை அறிவியல்துறை அமெரிக்கன் (Scientific American) எனும் மாதவிதழில் (மார்ச்சு 1983) வெளிவந்துள்ளது.

(தமிழ்த்தென்றல் திரு.வி.க. நூற்றாண்டு விழா மலர்,

வெளியீடு: தமிழர் முன்னேற்றக் கழகம் – இலண்டன் – பக்கம் 11 )

«««

 ஈ.எம்.எஸ்.நம்பூதிரிபாட் என்ன கூறுகிறார்?

“இந்திய வரலாற்றைப் பொறுத்தவரையில் ஆரியர்களின் வருகையுடன்தான் இந்திய வரலாறு துவங்குகிறது என்ற கருத்தைத்தான் ஒரு காலத்தில் நமது சரித்திர ஆசிரியர்கள் கூறிவந்தனர். ஆனால், ஆரியர்களுடையதைவிட உயர்வான ஒரு கலாச்சாரம் திராவிட மக்களுக்கிருந்தது என்றும், அது ஆரியர்-களுடையதைவிட பழமை வாய்ந்தது என்றும், தென் இந்திய வரலாற்று ஆசிரியர்கள் அக்காலத்திலேயே வாதாடினார்கள். 1922இல் கண்டுபிடிக்கப்பட்ட மொஹஞ்சதாரோ, ஹரப்பா என்னும் நகரங்களின் தடயங்களும் இவைகளை அடிப்படையாகக் கொண்டு வரலாற்று ஆசிரியர்கள் செய்துள்ள நிர்ணயிப்புகளும் திராவிடக் கலாச்சாரம் பற்றிய வாதத்தைப் பெருமளவுக்குப் பலப்படுத்தி யுள்ளது. இவ்வாறு ஆரிய சார்பினர், திராவிட சார்பினர் என்ற இரு பிரிவுகள் வரலாற்று ஆசிரியர்களிடையே தோன்றின.

சிந்து சமவெளி நாகரிகத்திற்கு ஆதாரமான விவசாயத்தில் விசேஷ தன்மைதான் இதற்குக் காரணமென்று கருத வேண்டியுள்ளது. இதர பல நதிக் கரைகளிலும் _ -பிற்காலத்தில் சிந்து சமவெளியிலும் _ உருவாகிய நீர்ப்பாசனக் கால்வாய்கள் சிந்துச் சமவெளி மனிதர்களுக்கு இருக்கவில்லை. அதற்குப் பதிலாக அணைக் கட்டினால் நதியிலிருந்து தண்ணீர் கிடைக்கக் கூடிய பகுதிகளில் மட்டும் அவர்கள் விவசாயம் செய்தனர். ஆகவே விவசாயத்திற்குத் தகுதியான நிலம் மிகக் குறைவாக இருந்தது.

குறைந்த அளவிலான இந்த விவசாயத்திலிருந்து உபரி தானியத்தை அடிப்படையாகக் கொண்ட சமுதாய கலாச்சார வாழ்க்கையின் எல்லை மிகக் குறுகலானது. புதிய தொழில்நுணுக்க முறைகளைப் பின்பற்றி உற்பத்தியைப் பெருக்கவோ, அதிகரித்த உபரியை அடிப்படையாகக் கொண்டு சமுதாய கலாச்சார வாழ்க்கையை உயர்த்தவோ சிந்துச் சமவெளி மனிதர்-களுக்கு ஊக்கமூட்டும் தூண்டுதல் இல்லாமல் இருந்தது. தலைமுறை தலைமுறையாக ஒரே விதமான விவசாயத்தையும் கைத்தொழில்களையும், வியாபாரத்தையும்தான் அவர்கள் செய்துவந்தனர். அந்தச் சமுதாயமும், நாகரிகமும் வளர்ச்சி குன்றியிருந்ததற்கு இது தான் காரணம்.

வளர்ச்சி குன்றி நின்றிருந்த இந்த சமூக கலாச்சார வாழ்க்கைகூட, ஆரியர்களுடைய முன்னேற்றத்திற்குத் தடையாக இருந்தது. விலங்கினத்தை வளர்ப்பதை அடிப்படையாகக் கொண்ட ஆரியர்களின் வாழ்க்கைக்கு சிந்துச் சமவெளி மக்கள் கட்டி உருவாக்கியிருந்த அணைகள் தடைகளாக இருந்தன. அணைகளை உடைத்து நதிகள் அவற்றின் போக்கில் விட்டால் மாத்திரமே ஆரியர்களுக்கு தங்களுடைய வளர்ப்பு மிருகங்களுடன் ஓரிடத்திலிருந்து வேறொரு இடத்திற்குச் செல்ல முடியும். அதனால் அவர் களுடைய யுத்த முயற்சிகளில் முதன்மையானது நதிகளை சுதந்திரமாக்குவதாக இருந்தது. (அவர்களுடைய வீர புருஷனான இந்திரன், விருத்திரனைக் கொன்றான் என்ற ரிக் வேத கதையின் வரலாற்று ரீதியான உள்ளடக்கம், சிந்து நதியின் மீது கட்டியிருந்த அணைகளை உடைத்தது பற்றியதாகும் என்று சில நிபுணர்கள் கருத்து தெரிவித்துள்ளனர்.)

அணைகளை உடைப்பதென்ற இந்த நாசவேலையின் மூலம் ஆரியர்கள் சிந்துச் சமவெளி நாகரிகத்தின் அடிப்படையையே தகர்த்துவிட்டார்கள். சிந்துச் சமவெளி நகரங்களைத் தீக்கிரையாக்கியதைவிடக் கொடுமையான ஒரு நாச வேலையாக இருந்தது இது. இத்துடன் சிந்துச் சமவெளி நாகரிகத்தின் அழிவு முழுமையாயிற்று.

(“இந்திய வரலாறு – ஒரு மார்க்சிய கண்ணோட்டம்’’ – ஈ.எம்.எஸ்.நம்பூதிரிபாட்)

தோழர் பி.இராமமூர்த்தி இவ்வளவு விரிவாக ஆரியர் _ திராவிடர் பற்றியும், சிந்து சமவெளி நாகரிகம் குறித்தும் ஒரு நூலாகவே எழுதியிருக்கும் நிலையில் ஆரியப் பார்ப்பன வார ஏடான ‘துக்ளக்’ எழுதுகிறது (25.10.2017, பக்கம் 10) பி.ராமமூர்த்தி போன்ற கம்யூனிஸ்ட் தலைவர்கள் எல்லாம் திராவிட நாட்டுக்கும் திராவிடம் என்ற சொல்லுக்கும் எதிரானவர்கள் என்று ‘துணிவாக’ பொய்யை எழுதுவதற்குச் சற்றும் கூச்சப்படாமல் திரித்து எழுதுவதைப் புரிந்து கொள்ள வேண்டும்.

திராவிடர்” பிரச்சினை எங்கும்! எங்கும்!!

  June 12, 2022 • Viduthalai

கவிஞர் கலி.பூங்குன்றன்

“திராவிடர்” என்று திராவிடர் கழகம் சொன்னால் மூக்கின் மீது கோபக்குரங்கு உட்கார்ந்திருந்து சேட்டை செய்கிறது. எரி நெருப்பில் விழுந்த புழு போல துடிக்கிறது ஒரு விபீடணக் கூட்டம்!

இப்பொழுது எங்கும் “திராவிடம் - திராவிடம்” என்ற சங்கொலி கேட்கிறது.

இதோ சில ஆதாரங்கள்: 

ஹார்வர்ட் பல்கலைக்கழகத்தை சேர்ந்த மரபணுவியலாளர் டேவிட் ரெய்ச்சின் ஆய்வு முடிவானது 2018 மார்ச்சில் வெளியானது. அவருடன் உலகத்தின் பல்வேறு பகுதிகளை சேர்ந்த, - வரலாறு தொல்லியல், மானுடவியல், மரபணுவியல் என பல்வேறு துறைகளைச் சேர்ந்த 92 அறிஞர்கள் இந்த ஆய்வில் பணியாற்றினார்கள். 

அந்த ஆய்வானது, கடந்த 10 ஆயிரம் ஆண்டுகளில் இரண்டு மிகப்பெரிய குடிப்பெயர்வு நடந்துள்ளது. முதல் குடிப்பெயர்வானது தென்மேற்கு ஈரான் பகுதியில் உள்ள அய்க்ரோஸிலிருந்து நடந்திருக்கிறது அதாவது, அங்கிருந்து இந்தியாவுக்கு விவசாயிகளாகவும், ஆடு மேய்ப்பவர்களாகவும் வந்திருக்கிறார்கள். இந்த குடிபெயர்வானது 7000 மற்றும் 3000 ஆண்டுகளுக்கு (இயேசு பிறப்பதற்கு முன்பு) இடையேயான காலக்கட்டத்தில் நடந்திருக்கிறது.

இந்த கால்நடை மேய்ப்பவர்கள், இதற்கு முன்பு இந்திய பகுதியில் இருக்கும் மனித இனத்தோடு கலந்திருக்கிறார்கள். இவர்களே சிந்துவெளி நாகரிகத்தை உருவாக்கியவர்கள்.

ஆரியர் வருகை

இரண்டாவது குடிபெயர்வு கிறிஸ்து பிறப்பதற்கு இரண்டாயிரம் ஆண்டுகளுக்கு முன்பு நடந்திருக்கிறது. அதாவது ஆரியர்கள் வருகை.

இது இன்றைய கஜகஸ்தான் பகுதியிலிருந்து வந்திருக்கலாம் என அனுமானிக்கிறார்கள். குதிரை செலுத்துவதில் வல்லுநர்களான அவர்கள் சமஸ்கிருதத்தின் முந்தைய மொழி வடிவத்தை கொண்டு வந்திருக்கிறார்கள். பலியிடும் பழக்கத்தையும், வேத பண்பாட்டையும் உருவாக்கியது அவர்கள் தான்.

இந்த நிலப்பரப்பில் ஏற்கெனவே வாழ்ந்தவர்கள் இந்திய தீபகற்பத்தை செம்மைப் படுத்திவைத்துள்ளனர் - அதாவது இந்திய மக்களின் மரபணுவை சோதனை செய்தால், அது 50 முதல் 65 சதவீதம் முதல் முதலாக இந்தமண்ணிலேயே தொடர்ந்துவாழும் இனத்தின் மரபணுவை ஒத்து இருக்கிறது. சிந்து சமவெளி நாகரிக மக்களின் மரபணுவும் ஒத்துப் போகிறது.

ஆரியப் பார்ப்பனர்களின் மரபணு பூர்வீக குடிகளின் மரபணுவோடு எங்கேயும் ஒத்துப்போகவில்லை.

திபெத்தோ-பர்மன் மக்கள் மற்றும் ஆஸ்ட்ரோ -ஆசிய மக்கள் என இந்தியாவில் நீண்ட இடைவெளிக்குப் பிறகு பல குடிபெயர்வுகள் நிகழ்ந்து இருக்கின்றன.

இந்திய ஆளும் வர்க்கமும் வேத பண்பாட்டை போற்றிப்புகழ்ந்துகொண்டே உள்ளது. ஒன்றிய கல்வித்துறை இணை அமைச்சர் சத்தியபால் சிங் “வேத கல்விதான் நம் குழந்தைகளுக்கு சிறந்தது” என்று பேசி இருக்கிறார்.

ஆரியர்கள் வெளியிலிருந்து வந்தவர்கள் என்பதை ஒப்புக்கொள்ள மறுப்பதற்கு மற்றொரு காரணம்,

வெளியிலிருந்து வந்தவர்கள் என்று அவர்கள் கூறும் முகலாயர்கள், ஆங்கிலேயர்கள் போல அவர்களும் வெளியிலிருந்து வந்தவர்கள் என்பது போலாகிவிடும் என்பதால்தான்.

வெறும் தத்துவ விவாதங்களாக மட்டும் முன்னெடுப்பதை இந்து வலதுசாரிகள் விரும்பவில்லை. அரியானாவை ஆளும் பா.ஜ.க. வேதங்களில் காணப்படும் சரஸ்வதி என்ற நதியை உண்மையாக தங்களின் அனைத்து அரசு பலத்தையும் பயன்படுத்தி மண்ணிலிருந்து கிளம்பும் நீரூற்றுகள் எல்லாம் மறைந்து போன சரஸ்வதி நதி தான் என்று கதைவிட்டுக் கொண்டு இருக்கிறது. பஞ்சாப் நதிகளின் அழுத்தம் தென்பகுதிகளை நோக்கி அழுத்தத்தோடு நிலத்தடி நீரோட்டமாக பாய்கிறது. அரியனா மற்றும் ராஜஸ்தானின் வடக்குப் பகுதிகளில் எங்கு தோண்டினாலும் கிடைக்கும் இடைவெளியில் நிலத்தடி நீர் பிரிட்டு அடிக்கும், உடனே இதோ சரஸ்வதி நதி என்பார்கள். ஆனால் அதன் தொடர்ச்சி ராவி, மற்றும் சட்லஜ் நதி என்று கண்டுபிடிக்கப்பட்ட பிறகு அடுத்த இடத்தில் தோண்டத் துவங்கி விடுகிறார்கள்.

சரஸ்வதி நாகரீகம் என்பதை உறுதி செய்ய பார்ப்பனர்கள் சரியாக வெள்ளையர்கள் நாட்டைவிட்டு வெளியேறிய உடனேயே, அவர்களின் கைகளில் அதிகாரம் சென்றதும் செய்யத் துவங்கிவிட்டனர்.

ஆனால் நேரு அதனைத்தொடர்ந்து இந்திராகாந்தி என மதச்சார்பின்மையைக் கடைப்பிடித்த தலைவர்களின் முன்பு பார்ப்பனர்களால் அவ்வளவாக சரஸ்வதி நதிதொடர்பான தேடலை முன்வைக்க முடியவில்லை. இந்த நிலையில் வாஜ்பாய் ஆட்சி வந்ததும் மீண்டும் சரஸ்வதி நதியை முழு வீச்சில் தோண்டத் துவங்கினர்.

தற்போது முழுமையாக ஹிந்துத்துவ கார்ப்பரேட் ஆட்சி நடந்துகொண்டு இருக்கிறது, ஆகையால் தான் இந்திய வரலாற்றையே மாற்றி எழுதிவிடவேண்டும் என்ற முனைப்போடு இந்திய மண்ணிற்கான தலைவர்களின் பெயர்களை அழிக்கும் வேலையில் ஈடுபட்டு வருகின்றனர்.

“திராவிடர்கள்தான் இந்தியாவின் பூர்வகுடிகள்.. உண்மையை ஆர்.எஸ்.எஸ்.   மறைக்கப்பார்க்கிறது” 

சித்தராமையா சாடல்!

“திராவிடர்கள்தான் இந்தியாவின் பூர்வகுடிகள். இந்த உண்மையை ஆர்.எஸ்.எஸ். மறைக்கப்பார்க்கிறது” என்று கருநாடக மேனாள் முதலமைச்சர் சித்தராமையா சாடியுள்ளார்.

கருநாடகாவில் 10ஆம் வகுப்பு அரசு பாடத்திட்டத்தில் ஆர்.எஸ்.எஸ். அமைப்பின் நிறுவனர் ஹெட்கேவாரின் கருத்துக்கள் சேர்க்கப்பட்டுள்ளன. இது பெரும் சர்ச்சையை ஏற்படுத்தியுள்ளது. மேலும் 10ஆம் வகுப்பு சமூக அறிவியல் பாடத்திலிருந்து சமூக சீர்திருத்தவாதிகளான தந்தை பெரியார்,  சிறீ நாராயண குரு ஆகியோர் குறித்த பாடங்கள் நீக்கப்பட்டுள்ளது அதிர்ச்சியை ஏற்படுத்தியுள்ளது.

கருநாடக கல்வித்துறையின் இந்த நடவடிக்கைக்கு எதிர்க்கட்சிகள் மற்றும் கல்வியாளர்கள் கடும் எதிர்ப்புகளைத் 

தெரிவித்து வருகின்றனர். இந்நிலையில், கருநாடக மாநிலத்தில் மேனாள் பிரதமர் நேரு நினைவு தினத்தை முன்னிட்டு, நிகழ்ச்சி ஒன்று நடைபெற்றது.

இந்த நிகழ்ச்சியில் அம்மாநில எதிர்க்கட்சி தலைவர் சித்தராமையா கலந்துக்கொண்டார். அப்போது நிகழ்ச்சியில் பேசிய சித்தராமையா, ஆர்.எஸ்.எஸ். அமைப்பைச் சார்ந்தவர்கள் என்ன இந்தியாவின் பூர்வகுடிகளா? ஆரியர்கள் இந்த நாட்டைச் சேர்ந்தவர்களா என சொல்லுங்கள்!

ஆர்.எஸ்.எஸ் அமைப்பினர் என்ன திராவிடர்களா? 600 ஆண்டுகளுக்கு முன்பு முகலாய ஆட்சிக்கு யார் பொறுப்பு? திராவிடர்கள்தான் இந்தியாவின் பூர்வகுடிகள். இந்த உண்மையை ஆர்.எஸ்.எஸ். மறைக்கப்பார்க்கிறது. பிரதமர் மோடி நாட்டை அய்ந்தாயிரம் ஆண்டுகள் பின்னோக்கி நகர்த்தும் அபாயகரமான வேலையை செய்து வருகிறார்” எனத் தெரிவித்துள்ளார்.

இந்த நிலையில் திராவிடர் - திராவிடர் என்று பேசும் சித்தராமையா தான் யார் என்பதைக் கூறமுடியுமா என்று கருநாடக முதலமைச்சர் பசவராஜ் பொம்மை கேள்வி எழுப்பினார். 

 இதற்கு பதிலளிக்கும் விதமாக பேசிய சித்தராமையா,   

நான் திராவிடன், எங்கள் ஊரில் வந்து எங்களையே யார் என்று கேட்கிறார்கள். இது எங்கள் மண். நான் திராவிடன் என்பதை நான் சொல்லித்தான் தெரிந்துகொள்ளும் நிலையில் நமது முதலமைச்சர் உள்ளாரே - என்று பதில் அளித்துள்ளார்.

வடக்கே வெகுண்டெழுந்த 

திராவிட இன எழுச்சி முழக்கம்

திராவிட -  ஆரியர் முழக்கம் தமிழ்நாட்டில் 1900 களிலேயே துவங்கிவிட்டது, ஆனால் அது வேங்கட எல்லையைக் கடக்க 100 ஆண்டுகளுக்கு மேல் ஆகிவிட்டது, 

2017 ஆம் ஆண்டு நாடாளுமன்றத்தில் மல்லிகார்ஜுன் கார்கேவின் முழக்கம், 

ஆம் நாங்கள் திராவிடர்கள் தான், இந்த மண்ணுக்கானவர்கள், இந்த மண்ணில் பிறந்து வளர்ந்தவர்கள், நீங்கள் ஆரியர்கள்; ஆடு, மாடுகளைமேய்த்துக் கொண்டு எங்கள் மண்ணில் நுழைந்தீர்கள்,  உங்களுக்கும் எங்களுக்கும் இன்றும் ஒரு மெல்லிய இடைவெளி உள்ளது என்று முழங்கினார். 

உடனடியாக அவரது பேச்சை திசைதிருப்ப ராஜ்நாத் சிங் அம்பேத்கர், அரசமைப்புச் சட்ட நாள் என பேசத் துவங்கிவிட்டார். 

அப்போது மல்லிகார்ஜுன் பரபரப்பாக பேசியது ஒரு சிறு தீப்பொறிதான். இன்று அது வட இந்தியாமுழுவதும் பற்றி எரிகிறது. 

 பார்ப்பனர்களும் அவர்களுக்கு ஒத்து ஊதும் வலதுசாரி ஆதரவாளர்களும் என்ன கூறுகிறார்கள்? 

 “இந்திய நாகரிகம் என்பது ஆரியர்களால் உருவாக்கப்பட்டது.. இந்திய தீபகற்பத்தில் நாங்கள் வடக்கும் தெற்கும் நாடோடிகளாக அலைந்து நாகரிகத்தைக் கற்றுக் கொடுத்து இந்திய நாகரிகத்தை கட்டி எழுப்பினோம் அந்த நாகரிகத்தின் தொடர்ச்சியாக வேதங்களை எழுதினோம். நவீன இந்தியா என்பது நாங்கள் உருவாக்கியது” நாங்கள் நாடோடிகளாக சென்று நாகரிகத்தைப் பரப்பாவிட்டால் இந்திய தீபகற்பம் ஆப்பிரிக்காவைப் போன்று இருக்கும்” என்று கூறுகின்றனர்.   

தங்கள் பிறப்பிடம் இந்தியாதான் என்பது ஆரியர்கள் வாதம். இங்கிருந்தே ஆசியா, அய்ரோப்பா ஆகிய நாடுகளுக்குப் பரவினோம். இப்போது இந்தியா மற்றும் அய்ரோப்பாவில் பேசப்படும் இந்தோ - அய்ரோப்பிய மொழிகளை உருவாக்கியது தாங்கள்தான் என்கிறார்கள். 19-ஆம் நூற்றாண்டில் மத்திய அய்ரோப்பாவை சேர்ந்த இனவரைவியலாளர்கள் மற்றும் ஹிட்லர், ஆரிய இனம் மேலான இனம் என்று கருதினார்கள். .நார்டிக் மரபை சேர்ந்த இனம் அது என்றார்கள்.

இந்தியாவின் முந்தைய நாகரிகம், அதாவது வடமேற்கில் இருந்த சிந்துவெளி நாகரிகம் வீழ்ச்சி அடைந்தபின் ஆரியர்கள் இந்த பகுதிக்கு வந்ததாக ஆராய்ச்சியாளர்கள் குறிப்பிடுகிறார்கள். இந்த சிந்துவெளி நாகரிகமானது,  எகிப்திய மற்றும் மெசோபோடாமிய நாகரிக காலகட்டத்தை சேர்ந்தது.

இந்த இரண்டு குழுக்களுக்குமிடையே கருத்து மோதல்கள் அதிகரித்த படியே வருகிறது. குறிப்பாக 2014ஆம் ஆண்டு பாஜக ஆட்சிக்கு வந்தபின் 2 தரப்பிற்கும் இடையேயான பதற்றம் அதிகரித்து வருகிறது. இந்த பழைமையான மரபணு ஆராய்ச்சியின் முடிவானது மக்கள் எங்கிருந்து எங்கு குடிபுகுந்தார்கள் என்ற விவகாரத்தில் புரிதலை வழங்குகிறது. 

திராவிடர் கழகத்தினர் மற்றும் பெரியார் இயக்கத்தவர் மட்டுமல்ல, ஆரியத்துக்கு எதிரான அனைவரும் திராவிடர்களே!

எழுச்சித் தமிழர் முழக்கம்!

``நான்கு வர்ணங்களை எதிர்த்து மூன்று நிறங்கள் தொடுக்கும் போரின் அறிவிப்பாக இந்த மாநாடு உள்ளது. நான்கு வர்ணங்களுக்குள் பல்லாயிரக்கணக்கான ஜாதிகள் உள்ளன. நாடு முழுவதும் உள்ள 30 கோடி தாழ்த்தப்பட்ட பழங்குடியின மக்கள் நான்கு வர்ணங்களுக்குள் வரமாட்டார்கள். பிற்படுத்தப்பட்ட, மிகவும் பிற்படுத்தப்பட்ட அரசால் அல்லது ஆதிக்க ஜாதியினரால் அடையாளப்படுத்தப்படுபவர்கள்தான் சூத்திரர்கள். இதை ஏற்றுக்கொள்ளாதவர்கள் தான் பஞ்சமர் என அழைக்கப்படுகின்றனர். வர்ணாசிரமத்தை தாழ்த்தப்பட்டோர் மற்றும் பஞ்சமர்கள் ஏற்றுக்கொள்வதில்லை.

இந்தியாவில் ஆரியன், திராவிடன் என இரண்டே மரபினம்தான். இரண்டுக்கும் டி.என்.ஏ. வேறு வேறு, ஏதோ தி.க.வும், தி.மு.க.வும் பெரியாரியர்கள் மட்டுமே திராவிடர்கள் என்று கருதக் கூடாது. இந்த மண்ணில் பட்டியலினத்தவர்கள், தாழ்த்தப்பட்டவர்கள் அனைவருமே திராவிடர்கள்தான். திராவிடத்தை எதிர்ப்பவர்கள் அயோத்திதாச பண்டிதர் பேசியதையும் எதிர்க்க வேண்டும். ஆனால் பெரியாரை மட்டுமே எதிர்ப்பார்கள்.

இந்தியாவில் எதிர்ப்புக் கலகம் செய்பவர்கள்தான் பறையர்கள். ஆரியர்கள் தங்களிடையே உருவாக்கிக்கொண்ட வாழ்க்கை முறைதான் நான்கு வர்ணம். அதில் சூத்திரர்கள் நாம் இல்லை. இந்தியா முழுவதும் வாழ்ந்தவர்கள் ஆதிதிராவிடர்கள். இந்தியாவே திராவிடர்களின் நாடுதான்.

ஆதிக்கத்தையும், சுரண்டலையும் எதிர்க்க போராடியவர்கள் அம்பேத்கர், பெரியார். மேல்ஜாதி, கீழ்ஜாதி கட்டமைப்பை அவ்வளவு எளிதாக வெட்டி சாய்த்து விட முடியாது. தேர்தல் காலத்தில் மட்டும்தான் இந்திய அரசியல் அமைப்பு சட்டம் வேலை செய்கிறது. மற்ற நேரத்தில் சனாதன மனுதர்ம சட்டம் மட்டுமே வேலை செய்கிறது

பட்டியலினத்தவர்களை வஞ்சகத்தால் வளைத்துப் பதவி தருகிறேன் எனக் கூறுவார்கள். இந்தியாவிற்கு பிரதமராக மோடி இருந்தாலும் பார்ப்பனர்களுக்கு அவர் பணியாள்தான். ஆர்.எஸ்.எஸ்சில் பார்ப்பனர்கள் மட்டுமே தலைவராக முடியும். பிரதமர் மோடி இன்னொரு முறைகூட பிரதமர் ஆகலாம். ஆனால் ஆர்.எஸ்.எஸ். இயக்கத்தின் தலைவராக முடியாது.சூத்திரர்கள் படித்தால் காதில் ஈயத்தைக் காய்ச்சி ஊற்ற வேண்டும் என மனுதர்மத்தில் சொல்லப்படுகிறது. அது பட்டியலினத்தவர்களை, பழங்குடியினரை சொல்லவில்லை. தங்களை சத்திரியர்கள் என்று சொல்லிக்கொள்ளும் மிகவும் பிற்படுத்தப்பட்ட பிரிவை சேர்ந்த சூத்திரருக்குத்தான் கோபம் வர வேண்டும். உண்மையான எதிராளிகளை அவர்கள் அடையாளம் காட்டவில்லை. சனாதன பார்ப்பன சக்திகளுக்கு 2024இல் வாய்ப்பு ஏற்படுவதைத் தடுக்க மார்க்சிய அம்பேத்கரிய பெரியாரிய உணர்வாளர்கள் ஒன்றிணைந்து செயல்பட வேண்டும்” என்கிறார் தொல்.திருமாவளவன்.

இந்தியா திராவிடர்களுக்கே சொந்தம்.. வேறு யாருக்கும் உரிமையில்லை”: 

அசாதுதீன் ஓவைசி பேச்சு!

கருநாடகாவில் 10ஆம் வகுப்பு அரசு பாடத்திட்டத்தில் ஆர்.எஸ்.எஸ். அமைப்பின் நிறுவனர் ஹெட்கேவாரின் கருத்துக்கள் சேர்க்கப்பட்டுள்ளது பெரும் சர்ச்சையை ஏற்படுத்தியுள்ளது. மேலும் 10ஆம் வகுப்பு சமூக அறிவியல் பாடத்திலிருந்து சமூக சீர்திருத்தவாதிகளான தந்தை பெரியார், சிறீ நாராயண குரு ஆகியோர் குறித்த பாடங்கள் நீக்கப்பட்டுள்ளது அதிர்ச்சியை ஏற்படுத்தியுள்ளது.

இதையடுத்து இந்தியாவின் பூர்வ குடிகள் திராவிடர்கள்தான். இந்த உண்மையை ஆர்.எஸ்.எஸ். அமைப்பு மறைக்கப்பார்க்கிறது என கருநாடக மாநில மேனாள் முதலமைச்சர் சித்தராமையா தெரிவித்திருந்தார். இந்நிலையில்,இந்தியா திராவிடர்களுக்கும், ஆதிவாசிகளுக்கும்தான் சொந்தம் என அனைத்து இந்திய மஜ்லிக் இ இதிஹாத் உல் முஸ்லிம் கட்சியின் தலைவர் அசாதுதீன் ஓவைசியும், சித்தராமையாவின் ஒத்தக்கருத்தையே பேசியுள்ளார்.

மகாராட்டிரா மாநிலம் பாய்வாடியில் நடைபெற்ற நிகழ்வில் அசாதுதீன் ஓவைசி, “இந்தியா என்னுடையதோ, தாக்கரேவின் உடையதோ, மோடியுடையதோ, அமித்ஷாவினுடையதோ அல்ல. இந்தியா யாருக்காவது சொந்தமென்றால் அது திராவிடர்களுக்கும், ஆதிவாசிகளுக்கும்தான். பாஜக - ஆர்.எஸ்.எஸ். ஆகியவை முகலாயர்களுக்கு பின்னர் வந்தவை. ஆப்பிரிக்கா, ஈரான், மத்திய ஆசியா, கிழக்கு ஆசியா ஆகிய பகுதிகளிலிருந்து மக்கள் இடம்பெயர்ந்து வந்த பின்னரே இந்தியா உருவானது” என தெரிவித்துள்ளார்.

இன்னும் ஏராளம் உண்டு - எதிரிகள் சீண்டினால் நமது சீற்றமும் சீறிக் கொண்டு ஆதார அம்பறாத் தூணியிலிருந்து வெளிவரும்!

பார்ப்பனர் - ஆரியர்களே என்பதற்குச் சான்றுகள்

  May 28, 2022 • Viduthalai

“மொழி ஞாயிறு” ஞா.தேவநேயப்பாவாணர் 

(பார்ப்பனர்கள் - ஆரியர்களே, என்பதை விளக்கி - பாவாணர் அவர்கள் தந்துள்ள ஆராய்ச்சி விளக்கங்கள் இது; அவரது சிறப்பு வாய்ந்த நூலான ‘ஒப்பியன் மொழி’ நூலிலிருந்து எடுக்கப்பட்டது.)

(1) உருவம் - நிறம் : பார்ப்பனர் வடக்கேயுள்ள குளிர்நாட்டி னின்றும் வந்தவராதலின், தமிழ்நாட்டிற்கு வந்த புதிதில் மேனாட் டாரைப்போல் வெண்ணிறமாயிருந்தனர்; பின்பு வெயிலிற் காயக் காயச் சிறிது சிறிதாய் நிறமாறி வருகின்றனர்.

‘கருத்தப் பார்ப்பானையும் சிவத்தப் பறையனையும் நம்பக் கூடாது’ என்பது பழமொழி. பார்ப்பனருக்குரிய நிறம் வெள்ளை யென்பதும், வெயிலிற்காயும் பறையனுக்குரிய நிறம் கருப்பென் பதும் இவர் இதற்கு மாறான நிறத்தினராயிருப்பின் அது பிறவிக்குற்றத்தைக் குறிக்குமென்பதும் இதன் கருத்து.

குடுமி : பண்டைத் தமிழருள் ஆடவர் (புருஷர்) குடுமி வைத்திருந்தனரேனும், பார்ப்பனரைப்போல மிகச் சிறிய உச்சிக்குடுமி வைத்திருந்ததாகத் தெரியவில்லை. பெண்டிர் இன்றுபோலத் தலைமயிர் முழுவதையும் வளரவிட்டனர். ஆடவர் சுற்றிவரச் சிறிது ஒதுக்கிக்கொண்டனர். ஆடவர் முடி சிறிதாயும், பெண்டிர் முடி பெரிதாயுமிருந்ததினால், இவை முறையே குஞ்சியென்றும், கூந்தலென்றும் கூறப்பட்டன. குடுமி என்பது உச்சிப் பாகத்தி லுள்ளதைக் குறிக்கும்.

“அன்னாய் வாழிவேண்டன்னை நம்மூர்ப்

பார்ப்பனக் குறுமகப் போலத் தாமுங்

குடுமித் தலைய மன்ற

நெடுமலை நாட னூர்ந்த மாவே”  

என்னும் அய்ங்குறுநூற்றுச் செய்யுளில் (குறிஞ்சி, 202), குதிரையின் தலையாட் டத்திற்குப் பார்ப்பனச் சிறுவனின் குடுமியை உவமை கூறி யிருப்பது, அது தமிழ்ச் சிறுவனின் குடுமியினும் மிகச் சிறிதா யிருந்தமைபற்றியே.

மீசை : மீசையைச் சிரைத்துக்கொள் ளும் வழக்கம் ஆரியரதே. தமிழரிற் சிலர் மேனாட்டாரியரைப் பின்பற்றி இப்போது மீசையைச் சிரைத்துக்கொள்கின்றனர்.

(2) உடை : பார்ப்பனருள் ஆடவர் பஞ்சகச்சம் கட்டுகின்றனர்; பெண்டிர் தாறு பாய்ச்சிக் கட்டுகின்றனர். இவை தமிழர் வழக்க மல்ல. விசுவப் பிராமணரென்று தங்களைக் கூறிக்கொள்ளும் கம்மாளர், பார்ப்பனரோடு இகலிக்கொண்டே சிலவிடத்து அவரது உடுமுறையைப் பின்பற்றுகின்றனர்.

நூல் : பூணூலணிதல் பார்ப்பனர்க்கே உரியது, ‘நூலெனிலோ கோல்சாயும்’ என்னுஞ் செய்யுளும், ‘ஊர்கெட நூலைவிடு’ என்னும் பழமொழியும் இதனை வற்புறுத்தும்.

தமிழ்நாட்டு வணிகரும் அய்வகைக் கம்மியரும் பூணூல் பூண்டது, அறியாமைபற்றி ஆரிய முறையைச் சிறந்ததாகக் கருதிய பிற்காலமாகும்.

ஆரியம் தமிழ்நாட்டில் வேரூன்றிப் பார்ப்பனருக்குத் தலைமையேற்பட்டபின், பல தமிழ் வகுப்பினர் தங்களுக்கு ஆரியத் தொடர்பு கூறுவதை உயர்வாகக் கருதினர். ஆரியக் குலமுறைக்கும் திராவிடக் குலமுறைக்கும் இயையு இல்லாவிடினும், ஆரியரல்லாதவரெல்லாம் சூத்திர வகுப்பின் பாற்பட்டவர் என்னும் தவறான ஆரியப் பொதுக்கொள்கைப் படி, தமிழ ரெல்லாருக்கும் சூத்திரப் பொதுப்பட்டம் சூட்டின பிற்காலத் தில், தமிழ் நாட்டிலுள்ள வணிகர் தங்களை வைசியரென்று சொல்லிக் கொண்டால், சூத்திரப்பட்டம் நீங்குவதுடன் ஆரியக் குலத் தொடர்புங் கூறிக்கொள்ளலா மென்று, ஆரிய முறையைப் பின்பற்றி வைசியர், சிரேஷ்டி (சிரேட்டி - செட்டி) என்னும் ஆரியப் பெயர்களையும், பூணூலணியும் வழக்கத்தையும் மேற்கொண்டனர். வணிகர் செல்வமிகுந்தவராதலின் அவரது துணையின் இன்றியமையாமையையும், தமிழர்க்குள் பிரிவு ஏற்பட ஏற்பட அவரது ஒற்றுமை கெட்டுத் தங்கட்குத் தமிழ்நாட் டில் ஊற்றமும், மேன்மையும் ஏற்பட வசதியாயிருப்பதையும், பார்ப்பனர் எண்ணித் தமிழ் வணிகருக்குத் தாராளமாய் வைசியப்பட்டம் தந்தனர்.

ஆரியர்க்குள், பூணூலணிவது பிராமணர், க்ஷத்திரியர், வைசியர் என்னும் மேல் மூவருணத்தார்க்கும் உரியதேனும், அது ஆரியரொடு தொடர்பில்லாத தமிழர்க்குச் சிறிதும் ஏற்பதன்று. ஒவ்வொரு நாட்டிலும் மறையோர், அரசர், வணிகர், உழவர் என்னும் நாற்பாலார் உளர். அவரையெல்லாம் (சிறிது வேறு பட்ட) ஆரிய முறைப்படி முறையே பிராமணர், க்ஷத்திரியர், வைசியர், சூத்திரர் என்று கொள்ளின், இங்கிலாந்திலுள்ள கந்தர்புரி (Canterbury)  அரசக் கண்காணிப்பாளரைப் (Arch Bishop) பிராமணரென்றும், மாட்சிமை தங்கிய ஆறாம் ஜியார்ஜ் மன்னரை க்ஷத்திரியரென்றும், அங்குள்ள வணிகத் தொழிலா ளரை வைசியரென்றும், உழவரையும், கூலிக் காரரையும் சூத்திர ரென்றும் கூறவேண்டும். ஆங்கிலேயர் ஒரு கலவைக் குலத்தா ரேனும், உறவுமுறையில் எல்லாரும் ஒரே குலத்தார் என்பது சரித்திரமறிந்த அனைவர்க்கும் தெளிவாய்த் தெரிந்ததே. பிராம ணர்கள் பிற நாடுகளிலுள்ளவர்களையும் ஆரியக்குல முறைப் படி பகுத்தாலும் பிராமணக் குலத்தன்மை மட்டும் தங்கட்கே யுரியதாகக் கொள்வர். அதோடு கூடியவரை எல்லாரை யும் சூத்திரரென்று பொதுப்படச் சொல்லி, பின்பு ஒரு பயனோக்கி அரசரை க்ஷத்திரியரென்றும், வணிகரை வைசியரென்றும் முன்னுக்குப்பின் முரண்படக் கூறுவது அவர் வழக்கம்.

ஆரிய - திராவிட வருண வேறுபாட்டைப் பின்னர் காண்க: 

கம்மியர் (கம்மாளர்) நெடுங்காலமாகப் பிராமணரொடு இகல்கொண்டு வருவதனால், தாமும் பிராமணரும் சமம் என்று காட்டுவதற்காகப் பூணூலணிந்து வருகின்றன ரேயன்றி வேறன்று.

தமிழ்நாட்டில் பூணூலணியும் தமிழரெல்லாம் ஏதேனும் ஒரு வணிகத் தொழிலராயும், கம்மியத் தொழிலராயுமே இருப்பர். தமிழரின் நாகரிகத்தையும், சரித்திரத்தையும் அறியாத தமிழர், ஆரிய நாகரிகத்தை உயர்ந்ததென மயங்கி, இக்காலத்தும் ஆரிய வழக்கத்தை மேற்கொள்வதால் உயர்வடையலாமென்று கருது கின்றனர். சில ஆண்டுகட்குமுன் சிவகாசி, சாத்தூர் முதலிய சில இடங்களிலுள்ள தனித் தமிழரான நாடார் குலத்தினர், புதிதாகப் பூணூலணிந்து கொண்டதுடன், தங்களை க்ஷத்திரியரென்றும் கூறிக்கொண்டனர். நாடார் குலத்தினர் வணிக குலத்தைச் சேர்ந்தவரென்பது உலக வழக்காலும், நூல் வழக்காலும் தெளிவாயறியக் கிடக்கின்றது. வைசியர், க்ஷத்திரியர் என்னும் பெயர்கள் வடசொற்களாயிருப்பதுடன், க்ஷத்திரியர் என்னும் பெயர் நாடார் குலத்திற்கு ஏற்காததாயு மிருக்கின்றது.

நூல் என்பது புத்தகத்திற்கும் இழைக்கும் பொதுப் பெயராத லின், நூலோர் என்னும் பெயர் அறிஞரையும் பார்ப்பனரையுங் குறிக்கும் இடம் நோக்கி யறிந்து கொள்க.

(3) நடை : தொல்காப்பிய மெய்ப்பாட்டியலில், 12ஆம் சூத்திர வுரையில், “தன்மையென்பது சாதித் தன்மை; அவையாவன பார்ப்பாராயிற் குந்திமிதித்துக் குறுநடைக் கொண்டு வந்து தோன்றலும்” என்று நச்சினார்க்கினியர் கூறியுள்ளார். இத் தன்மையை இன்றும் ஆங்கில நாகரிகம் நுழையாத சிற்றூர்களிற் காணலாம்.

(4) மொழி : பார்ப்பனரின் முன்னோர் பேசிய மொழி வடமொழியாகும். வடமொழி என்பது சமஸ்கிருதம். பண்டைக் காலத்தில் வடக்கில் சமஸ்கிருதமும், தெற்கில் தமிழுமாக இரு பெரு மொழிகளே இந்தியாவில் வழங்கி வந்தன. அதனால் அவற்றுக்கு முறையே வடமொழி, தென்மொழி என்று பெயர்.

வடமொழி செயற்கையான வடிவில் மிக முதிர்ந்ததாதலின் வழக்குறாது போய்விட்டது. ஆனாலும், ஆரியப் பிராமணரின் வழியினரான பார்ப்பனர் இன்று வடமொழியைத் தம்மாலியன்ற வரை பாதுகாத்து வருகின்றனர். பிராமணர் இந்தியாவில் எந்த இடத்திலிருந்தாலும், எந்த மொழியைத் தாய்மொழியாகக் கொண்டிருந்தாலும் வடமொழிப் பயிற்சியை மட்டும் விடார். மற்ற வகுப்பாரோ பெரும்பாலும் தத்தம் தாய்மொழிகளையே அறிந்திருப்பர். வடமொழியின் கடினம்பற்றிச் சில பார்ப்பனர் அதைக் கல்லாதிருப்பினும், அதன்மேல் வைத்திருக்கும் பற்றில் மட்டும், அதைக் கற்றவரினும் எள்ளளவும் குறைந்தவராகார். பார்ப்பனர் பிற மொழிகளைத் தாய்மொழிகளாகக் கொண்டிருப்பதும், வடமொழி வழக்கற்றவிடத்து வேறு போக்கின்றியே யன்றி வேறன்று.

பார்ப்பனர் வடமொழியைப் பேசாவிடினும் வளர்ப்பு மொழியாகக் கொண்டுள்ளமையின், அவர்க்கு வடமொழியாளர் என்று பெயர்.

மணிமேகலையில், ‘வடமொழியாளர்’ (5 : 40) என்று பார்ப்பனர்க் கும், ‘வடமொழி யாட்டி’ (13 : 78) என்று பார்ப்பனிக்கும் வந்திருத் தல் காண்க.

வடமொழிக்குத் தமிழ் நூல்களில் ஆரியம் என்னும் பெயரும் வழங்குகின்றது. இப் பெயரொன்றே பார்ப்பனரைத் திராவிடரி னின்றும் வேறான ஆரியராகக் கொள்ளப் போதிய சான்றாகும். ஆரிய நாடு, ஆரியபூமி, ஆரியாவர்த்தம் என்று சொல்லப்படுவது பனி (இமய) மலைக்கும், விந்திய மலைக்கும் இடையிலுள்ள பாகமாகும். இதுதான் ஆரியர் இந்தியாவில் முதலாவது பரவி நிலைத்த இடம். இங்கு வழங்கினதினால்தான் ஆரிய மொழிக்கு ‘வடமொழி’ யென்றுபெயர்.

வடநாட்டில், ஆரியரும், ஆரியர்க்கு முந்தின பழங்குடிகளும் பெரும்பாலும் கலந்துபோனமையின், பிற்காலத்தில் வட நாட்டார்க்கெல்லாம் பொதுவாக ‘வடவர்’ ‘ஆரியர்’ என்னும் பெயர்கள் தமிழ் நூல்களில் வழங்கிவருகின்றன.

ஆரியம் என்னும் பெயரால் தமிழ்நாட்டில்  ஒரு பொருளுங் குறிக்கப்படுவதில்லை. ஆரியக் கூத்து என்பது தமிழ்நாட்டில் இசைத் தமிழும், நாடகத் தமிழும் வழக்கற்றபின், வடநாட்டார் வந்து ஆடிய நாடகத்திறமேயன்றி, பல்கலைக்கழக அகராதியிற் குறிக்கப்பட்டுள்ளபடி கழைக் கூத்தன்று.

ஆரியன் என்னும் பெயருக்கு, ஆசிரியன், பெரியோன், பூசாரியன் முதலிய பொருள்களெல்லாம் தமிழில் தோன்றினது தமிழ் நாட்டில் பார்ப்பனத் தலைமை ஏற்பட்ட பிற்காலத்தேயாகும். இப் பொருள்களும் நூல் வழக்கேயன்றி உலக வழக்காகா.

வடமொழி, தென்மொழியின் செவிலித்தாயென்றும், நற்றா யென்றும், இந்தியப் பொதுமொழியென்றும் ஆராய்ச்சியில்லாத பலர் கூறி வருகின்றனர். உலக மொழிகளில், ஆரிய மொழிகளும் திராவிட மொழிகளும் மொழிநிலையில் மிக வேறுபட்டன வாகும். திராவிடக் குடும்பம் மிக இயல்பானதும், ‘ஆரியக் குடும்பம் மிகத் திரிந்ததுமாகும். அவற்றுள்ளும், இயல்பிற் சிறந்த தமிழும் திரிபில் முதிர்ந்த வடமொழியும் மிக மிக வேறு பட்டனவாகும்.

‘விடுதலை’ - 13.02.1995